Dard Men Lazzat Bahut Ashkon Men Ranaai Bahut

Dard Men Lazzat Bahut Ashkon Men Ranaai Bahut

Ay Gham-e-Hasti Hame Duniya Pasand Aai Bahut

Ho Na Ho Dasht-o-Chaman Men Ik Taalluq Hai Zaroor

Baad-e-Saahrai Bhi Khushboyen Utha Layi Bahut

Maslahat Ka Jabr Aisa Tha Ke Chup Rehna Para

Warna Usloob-e-Zamane Pe Hansi Aai Bahut

BeSahaaron Ki Muhabbat BeNawaon Ka Khuloos

Aah Yeh Daulat Ke Insaano Ne Thukraai Bahut

BeKhayali Men Bhi Kitne Faasle Tai Ho Gaye

BeIraada Bhi Yeh Duniya Door Le Aai Bahut

Apni Fitrat Men Bhi Roshan Honge Lekin Ay Zameer

Meri Raaton Se Bhi Taaron Ne Chamak Paai Bahut...-